Молебен о воинах, идущих на брань (скачать pdf) 

ПСАЛОМ 90

Живый в помощи Вышняго, в крове Бога Небеснаго водворится. Речет Господеви: Заступник мой еси и Прибежище мое, Бог мой, и уповаю на Него. Яко Той избавит тя от сети ловчи, и от словесе мятежна, плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни, от вещи во тме преходящия, от сряща, и беса полуденнаго. Падет от страны твоея тысяща, и тма одесную тебе, к тебе же не приближится, обаче очима твоима смотриши, и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло, и рана не приближится телеси твоему, яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою, на аспида и василиска наступиши, и попереши льва и змия. Яко на Мя упова, и избавлю и: покрыю и, яко позна имя Мое.Воззовет ко Мне, и услышу его: с ним есмь в скорби, изму его, и прославлю его, долготою дней исполню его, и явлю ему спасение Мое.

ТРОПАРЬ КРЕСТУ И МОЛИТВА ЗА ОТЕЧЕСТВО, глас 1

Спаси, Господи, люди Твоя и благослови достояние Твое, победы на сопротивныя даруя и Твое сохраняя Крестом Твоим жительство.

ТРОПАРЬ ИКОНЕ БОГОРОДИЦЫ «ДЕРЖАВНАЯ», глас 4

Града Сионска взыскующе, под Твой покров, Дева Чистая, днесь притекаем, и никтоже возможет на ны, яко несть град силен, аще не Сущаго Бога, и несть ина крепость, аще не милость Владычицы Девы.

ТРОПАРЬ АРХИСТРАТИГУ БОЖИЮ МИХАИЛУ, глас 4

Небесных воинств Архистратиже, молим тя присно мы недостойнии, да твоими молитвами оградиши нас кровом крил невещественныя твоея славы, сохраняя ны, припадающия прилежно и вопиющия: от бед избави ны, яко чиноначальник Вышних Сил.

ТРОПАРЬ БЛАГОВЕРНОМУ КНЯЗЮ АЛЕКСАНДРУ НЕВСКОМУ, глас 4

Яко благочестиваго корене пречестная отрасль был еси, блаженне Александре, яви бо тя Христос яко некое Божественное сокровище Российстей земли, новаго чудотворца преславна и Богоприятна. И днесь сошедшеся в память твою верою и любовию, во псалмех и пениих радующеся славим Господа, давшаго тебе благодать исцелений. Егоже моли спасти град сей, и стране нашей Богоугодней быти, и сыновом Российским спастися.

ТРОПАРЬ ВЕЛИКОМУЧЕНИКУ ГЕОРГИЮ ПОБЕДОНОСЦУ, глас 4

Яко пленных свободитель и нищих защититель, немощствующих врач, Царей поборниче, победоносче великомучениче Георгие, моли Христа Бога спастися душам нашим.

МОЛИТВА О СВЯТОЙ РУСИ

Господи Боже сил, Боже спасения нашего, призри в милости на смиренныя рабы Твоя, услыши и помилуй нас: се бо брани хотящии ополчишася на Святую Русь, чающе разделити и погубити единый народ ея.
Возстани, Боже, в помощь людем Твоим и подаждь нам силою Твоею победу.
Верным чадам Твоим, о единстве Церкви Русския ревнующим, поспешествуй, в духе братолюбия укрепи их и от бед избави. Запрети раздирающим во омрачении умов и ожесточении сердец ризу Твою яже есть Церковь Живаго Бога, и замыслы их ниспровергни.
Благодатию Твоею власти предержащия ко всякому благу настави и мудростию Твоею обогати!
Воины и вся защитники Отечества нашего в заповедех Твоих утверди, крепость духа им низпосли, от смерти, ран и пленения сохрани!
Лишенныя крова и в изгнании сущия в домы введи, алчущия напитай, недугующия и страждущия укрепи и исцели, в смятении и печали сущим надежду благую и утешение подаждь!
Всем же во дни сия убиенным и от ран и болезней скончавшимся прощение грехов даруй и блаженное упокоение сотвори!
Исполни нас яже в Тя веры, надежды и любве, яко да единеми усты и единем сердцем исповемыся Тебе, Единому Богу в Троице славимому.
Ты бо еси заступление, и победа, и спасение уповающим на Тя, и Тебе славу возсылаем, Отцу и Сыну и Святому Духу, ныне и присно, и во веки веков. Аминь.

МОЛИТВА О ВОИНАХ, ИДУЩИХ НА БРАНЬ

Господи Боже наш, услыши нас молящих Ти ся о собравшихся воинах сих (имена), и благослови, и укрепи их: и даждь им сердце мужественно на сопротивныя враги.
Ангела светла посли им, врагом же страшна и ужасна, запинающа же и погоняюща, и сердце их разслабляюща, и дерзновение в бегство претворяюща.
Отыми же от рабов твоих на брань ныне исходящих, и от всех нас всякий глад и губительство, и избави их от всякого оружия, огня, нашествия врагов, и от восстания противнаго.
Спутешественник им буди, и подаждь им вся, яже ко спасению прошения: научи их и вразуми, спаси, защити, сохрани их очисти, и радости духовныя исполни: души и телу и заступник и защитник буди, и яко Благ и милосерд и Человеколюбец прощение грехов подаждь им в день судный. Благослови начальников их, укрепи десницу их, даруй им ум бодр, вложи в сердца их благая о подчиненных их и о всех людех Твоих. Помилуй их и нас всех, и благослови во вся дни жизни нашея: да от Тебе помощь и заступление, и избаву приимше, славу и благодарение без всякого препятия всегда приносим.
Ты бо еси крепость и утверждение людем Твоим, и Тебе славу возсылаем со Единородным Твоим Сыном, и с Пресвятым, и Благим, и животворящим Твоим Духом, ныне и присно, во веки веков.
Аминь.